"അവൾ ...അവൾ വല്ലാതെ മാറിപ്പോയെടാ ". ഒരു സുഹൃത്ത് അവന്റെ സുഹൃത്തിനെ പറ്റി പറഞ്ഞതാണ്. ഒരു കാലത്ത് അവളുടെ എല്ലാം പറയാനും , കരയാനും ചിരിക്കാനും എല്ലാം അവൻ വേണമായിരുന്നു പോലും. ഇപ്പൊ നോ തിരിഞ്ഞു നോട്ടം.
ഭൂതകാലം ഓർമ്മകളാൽ നിർമ്മിക്കപ്പെട്ട ഒരു കൂടാരമാണ്. അമ്മൂമ്മയുടെ ദോശയുടെ സ്വാദും, അപ്പൂപ്പന്റെ കഥകളുടെ ഭംഗിയും, അച്ഛന്റെ സ്നേഹമുള്ള ശകാരത്തിന്റെ ചൂടും, അമ്മയുടെ സങ്കടങ്ങളുടെ ചുരുളും, ചേച്ചിയുടെയോ ചേട്ടന്റെയോ വീരേതിഹാസങ്ങളുടെ കഥകളും...അങ്ങനെ പലതും ആ കൂടാരത്തിലുണ്ട്. അക്കൂട്ടത്തിൽ ഏറ്റവും തെളിഞ്ഞു കിടക്കുന്ന ഒന്നാണ് സൗഹൃദങ്ങൾ.
ആണായാലും പെണ്ണായാലും , സുഹൃത്തുക്കളോടൊപ്പം ചിലവഴിച്ച നിമിഷങ്ങൾ, ആ ഓർമകൾക്ക് ഒരു പ്രത്യേക സുഖമുണ്ട്. നിങ്ങൾക്ക് താങ്ങായും, ചില സമയത്ത് നിങ്ങൾക്കിട്ട് തന്നെ 'താങ്ങാനും', ഒരു support എന്നതിലുപരി ഒരു വലിയ ക്യാനവാസ്സിൽ പെടുത്താവുന്ന ബന്ധങ്ങളാണ് പല സൗഹൃദങ്ങളും. പക്ഷെ, ജീവിതത്തിൽ പല തലങ്ങളിലേക്ക് പറക്കുമ്പോഴും ചിലർ അത് മറക്കുന്നു...സൗകര്യപൂർവ്വം.
ജീവിതത്തിൽ പുതിയത് പലതും വരാം. പണം, പദവി, പുതിയൊരു കുടുംബം, പുതിയ സൗഹൃദങ്ങൾ...അതൊന്നും തെറ്റല്ല . പക്ഷെ, സുഖലോലുപതയുടെയും പണക്കെട്ടുകളുടെയും ചിലവിൽ, കാലം മായ്ക്കുന്ന ജീവിത കെട്ടുകാഴ്ച്ചകൽക്കിടയിലും , നാം എങ്ങനെ, എവിടുന്നു, വന്നു എന്ന് മറക്കരുത്. അക്കൂട്ടത്തിൽ ഒരു കാലത്ത് കൂടെ നിന്ന സൗഹൃദങ്ങളേയും.
ഓർമ്മകൾ ഉണ്ടായിരിക്കണം!
