ഉമ്മാച്ചു

ഉമ്മാച്ചു :

ശ്രീ. ഉറൂബിന്റെ (പി.സി. കുട്ടികൃഷ്ണൻ) മനോഹരമായ ഒരു പുസ്തകം തന്നെയാണ് "ഉമ്മാച്ചു". അല്ലേലും, മലയാള സാഹിത്യത്തിലെ അതി കായന്മാരിൽ ഒരാളായ ഉറൂബിൽ നിന്നും അതല്ലേ പ്രതീക്ഷിക്കാൻ കഴിയു. പക്ഷെ, വ്യക്തിപരമായി എനിക്കീ പുസ്തകം ഒരു നല്ല വായനാനുഭവം സമ്മാനിച്ചില്ല. ഒരുപാട് കഷ്ടപ്പെട്ട്, പലപ്പോഴും ബോറടിച്ചാണ് ഈ പുസ്തകം വായിച്ചു തീർത്തത്. ലളിതമായ, എന്നാൽ സൗന്ദര്യമുള്ള രീതിയിൽ തന്നെയാണ് ഈ കഥയുടെ ആഖ്യാനമെങ്കിലും, ഈ ഒരു തലമുറയിൽ ഉള്ള ഒരാൾക്ക്‌ ഇതെത്ര മാത്രം ദഹിക്കും എന്ന് കണ്ടറിയണം.

എനിക്ക് തോന്നുന്നത്, ഈ പുസ്തകത്തിന്റെയോ അല്ലെങ്കിൽ രചയിതാവിന്റെയോ കുറ്റമല്ല, മറിച്ചു , ഒരുപാട് സിനിമകളിലും ( ഈ നോവൽ തന്നെ ഒരു സിനിമ ആയിട്ടുണ്ട്) മറ്റും കണ്ടു പരിചിതമായ കഥാ സന്ദർഭങ്ങൾ, കഥാപാത്രങ്ങൾ, പൈങ്കിളി രൂപേണയുള്ള സംഭാഷണങ്ങൾ, വായിക്കുന്ന ആളുടെയും കഥയുടെയും കാലഘട്ടങ്ങളുടെ അന്തരം ...ഇവയോക്കെയാകാം എനിക്ക് ഈ പുസ്തകത്തെ അത്ര കണ്ടു അങ്ങ് ഇഷ്ടപെടാതെ പോകാനുള്ള കാരണം. ഒരു പക്ഷെ, മറ്റൊരാള്ക്ക് വേറൊരു അഭിപ്രായം ആയിരിക്കാം.

കാമിനി മൂലമുള്ള കലഹങ്ങളുടെ കഥയാണ്‌ "ഉമ്മാച്ചു". അത് നന്നായി തന്നെ പറയുന്നുമുണ്ട്. പക്ഷെ, എല്ലാം വളരെ പതുക്കെയും പ്രവചിക്കാവുന്നതമാണ്.എന്തായാലും, എന്നെക്കാൾ മുതിര്ന്ന തലമുറയിൽ ഉള്ളവർക്ക് ഈ പുസ്തകം നല്ലൊരു വായനാനുഭവം ആയിരിക്കും. അവർക്ക് വേണ്ടി ഞാൻ ഈ പുസ്തകം ഡെഡിക്കേറ്റ് ചെയുന്നു.

വാൽ: ഇനി കുറച്ചു നാൾ മലയാളം ക്ലാസ്സിക്‌ നോവലുകൾക്ക് ഒരു അവധി കൊടുക്കാമെന്നു വെച്ചു. പിന്നെ, ഉറൂബിനെ പോലുള്ള മഹാരഥന്മാരെ വിമർശിക്കാൻ ഞാൻ ആളല്ല. എന്റെ അഭിപ്രായം പറഞ്ഞു എന്നെ ഉള്ളു. വാക്കുകൾ കൊണ്ടെന്നെ കൊല്ലരുത്.